نحن متلكن قرفانين..
ضايعين..
منهوبين.
شو هالخازوق لي حاسبينو علينا وطن...
شو هالعصابة لي حاسبينن علينا حكّام...
وشو هالعقوبة لي حاسبينا علينا حياة.
لبنان...
وكل مسلّماتو...
كذبة كذبوها علينا نحن وزغار...
لعبة قمار فوتونا فيها نحن وكبار...
ونصبة...
اكتشفناها مأخرين بعد ما ضاع الماضي وما عاد في مستقبل.
لبنان...
اوتيل...
أسعارو نار....
خدمتو خرائية...
وما في حل الا انو الواحد يتركو... وحتى بعد ما يتركو،
بتضل لعنتو لاحقة الواحد لتسرق شقا عمرو.
لبنان...
واحة أديان ما فيها حدا بيعرف الله....
الحاكم همّو ينهب...
رجل الدين مش فاهم انو هو صاحب رسالة مش وظيفة...
التاجر بيحتكر لقمة الخبز عأهلو... والصيدلي بيخبّي الدوا عن جماعتو،
والصرّاف بيتاجر بأهل بيتو، وصاحب المستشفى بيوزّع فرص الحياة عالأغنيا،
بالعملة الصعبة.
لبنان...
بلد الفولكلور وأغاني التعايش ومحمد وعلي وجورج ومعروف
و و....
يلي ضاعت أعمارهن بالحرب
وما فهموا ورجعوا يضيعوا مستقبل ولادهن بالحرب
وبعدهن مفكرين انو عم ياخدوا بتار الحسين
أو عم يحافظوا عوجود أحفاد المسيح
أو عم يدافعوا عن إرث وسمعة الصحابة...
معقول كل هودي يلي اجوا بدعوة سلام ومحبة
واشباع الجائع ونصرة المظلوم، فرّخوا ناس
دينا دولارا؟!
أنا مين بيشبهني؟
انت مين بيشبهك؟
الشيعي المتعصب
يلي ما بيرضى تجيب سيرة ايران وروسيا؟
بيحاضر بشؤون اليمن وهو مش قادر يأمّن حليب لولادو؟
أو السني المتعصب
يلي بتفكر ملك السعودية فاتحلو بيتو وحكام الإمارات
عم يصرفوا عليه،
وهو عم يصارع الدني ليجيب ربطة خبز؟
أو الماروني المسيحي المتعصب
يلي حاطط جوعو عجنب
وتارك نص أهلو بالغربة
وملتهي بإثبات انو هو العرق المؤسس المتفوق
وكامشلي خرافة
مجد لبنان
ولاحقنا انو عم يستردّ الحقوق، بس ما قادر يدفع قسط ولادو؟
أو العامل حالو لا طائفي
ولاكك لسانو
كلمة عربي عشرة انكليزي غلط... طلع معو acronym حلو
قام ركّب عليه NGO
وأخد رتبة ممسحة
بشي سفارة
بيطلّع من وراها كم ألف دولار
أو العواطلي
يلي ما لقا شغل
قام فتح دكانة سمّاها
مركز أبحاث
وصار يطلع كل جمعة عمحطّة تلفزيون يحاضر فينا بالاستراتيجيا؟
أو الإعلامي
أبو عشر فرنكات
يلي بيطلع بينفضك مقدمة برنامج أو أخبار
بتفكرو غيفارا،
وبيرجع بيستضيف
المعاليك والسعادات
وبيتزلّف وبيصير معهن
ينتقدوا
"المنظومة"؟
أنا مين بيشبهني؟
انت مين بيشبهك؟
جوعان
ما بيقطع طريق الا اذا غمزو زعيم ميليشيا سابق او مشروع زعيم ميليشيا حالي؟
شخص أكلتو الإيديولوجيا وغسلولو دماغو
بالصراعات الدولية
وصار كل ما حدا نزل بمظاهرة يتهمو انو مدفوش من سفارة، بالوقت يلي زعماؤه
فاتحين بيوتن قنصليات
وبينفخوا حالن
اذا شي سفير
عطاهن ريق حلو؟
أورئيس حكومة مستقيل
ما عاد الو خلق
يصرّف أعمال
ومفلّت وزرا حكومتو
عالشاشات؟
أو رئيس حكومة مكلّف
حاطط التكليف بجيبة قميصو وطز بالناس
ووجع الناس وجوع الناس....
يلي عأساس استقال استجابةً لطلبهن؟
أو رئاسة جمهورية
صارت تبلغنا
بالقلق عبر بيانات بيقراها مستشار اعلامي متل بالتمانينات؟
أو مجلس نواب
مفكر انو الدولار
متل شرطة المجلس
بيقولولو نزال بينزل،
وهمّن يصالحوا
الزعران عالزعران
ليضلّ النظام؟
أو رؤسا طوائف
بيحكوا سياسة كل النهار
بين حياد وانخراط بالصراعات، ورعاياهن محروق نفسهن
بين حقوق حضانة
وطلبات طلاق معلّقة
وزواج قاصرات
وكل يوم مشكل جديد.
مين بيشبهني؟
تافه بعلبكي
ما عم يعرف يصير مشهور
الا عبر انو
يطلع عبرامج التنكيت
يعوِج نيعو
ويبالغ بلكنتو
ويحكي عن الحشيش
ليضحّك مقدّم برامج
عنصري،
مش عارف
انو عم يضحّك الناس
عليه؟
كيف بدنا ننتمي لهيك مجتمع؟
نحن منشبه
الفقير
يلي قاعد ببيتو
عزيز النفس
وخايف ينزل يتظاهر
لإنو حتى الطريق
سرقوه منو
الزعران.
نحنا منشبه
المسافر
يلي مش عم يعرف
يحضر شي غير المحطات اللبنانية...
قد ما رفعتلو ضغطو
منشبه
يلي اشتغل عمر بالخليج وبافريقيا وحط مصاريه
ببلدو
ليكتشف بعمر الخمسين،
انو رجع بلش
من الصفر.
منشبه
يلي عايش باميركا واستراليا وكندا وكان ينطر الصيف
لينزل يشوف بلدو،
وحتى هيدي
حرموه منا.
هيدا الشي يلي
اسمو
لبنان
ما عندو شي من مقومات
الوطن،
وأغلبية ناسو
ما عندن شي
من صفات المواطن،
واغلبية رجال الدين
فيه ما عندن شي من
صفات الله.
وبلا سبب
بلا سيطرة
بلا قرار
بعدنا
منحبّو!
هيك....
لعنة!
بعلبكيات



