كتب ناجي أمهز,,
انه حتى وجع اللبناني ممنوع يكون في بنج يخففه، يعني حتى يلي عم بموت لازم يموت موجوع، يعني فوق الموت عصة قبر.
دخيل اسم ربنا، على لبنان يلي ولا مرة عرفنا اذا كان وطن او حلبة مصارعة، يعني على ايام العثماني كانوا اللبنانية منقسمين، فل العثماني وحل محله الفرنساوي قام اللبنانية انقسموا حول الفرنسي، فل المفوض السامي الفرنسي وحل محله مفوض عند المفوض الفرنساوي، وبقينا منقسمين, وحتى حول العدو الاسرائيلي منقسمين، واذا كنا عرب او فينيقيين منقسمين.
شو هالبلد يلي ما بتلحق فيه تخلص من اانتداب بتلاقي حالك محتل، بتتحرر من الاحتلال الاسرائيلي، بتلاقي حالك باحتلال اكير وهو الفساد.
يعني اربعمية سنة لا عرفنا تحررنا، ولا عرفنا توحدنا، مع انه نصف الشعب اللبناني مصاب بالتوحد، ويلي عقلاته مناح بيمشي وبيحكي مع حاله على الطريق، ومع هيك بتلاقي الشعب اللبناني بيفهم بالطب والاقتصاد والنووي وشو عم بصير بالعالم، وهو مش عارف اذا عنده خبز بالبيت او رح تجي الكهربا او ما راح تجي.
يا عمي شو هيدا، يعني اكبر غضب غضبو ربنا على اكثر ناس كفروا بالتاريخ، ما استمر سبع سنين، دخليك يا رب صرلنا سبعمية سنة منتعذب، ويمكن نضل ليوم الدين، ساعدنا، ، الناس عم تموت كل يوم الف موتة، ومش قادرة تلاقي خبزاتها ولا ادويتها.
عنجد شي مش معقول، الناس بس تفوت على الحمام على العتم عم تشرشر وطرطش حالها.
وقال شو عنا زعماء، يا شعب لبنان، الزعيم هو يلي بيضرب ايده على جيبته وبطعمي الناس، مش الزعيم يلي بيضرب ايده على مال الناس والدولة تيعمل زعيم، يا عمي شوفوا شو صار فيكم، دلوني على بيت لبناني واحد مرتاح.
يا عمي بمجاعة 1914 الناس اكلت لحم بعضها من الجوع وما استرجت تقتحم بيت زعيم تاخد منه كيس طحين، مع انه الزعيم عنده الف كيس طحين اخدهم من الناس، بس طول عمره الشعب اللبناني بموت كرمال يعيش الزعيم.
يا جماعة كل الطوائف، اذا واحد منكم بده من جاره او صديقه او حتى اخوه مية دولار، بيتبرا منه، وبينسى الملح والخبز وبطلعه عن دينه، ،يا عمي راحوا مصرياتكم وجنى اعماركم، وتبخرت تعويضاتكم، ما سمعنا صوت حدا فيكم.
يا عمي اهالينا ماتوا وما فهمنا، نحنا نصنا بالقبر وما فهمنا، ولادنا واخواتنا عم بموتوا بالغربة واطفالنا عم بموتوا ما معنا نجبلهم كيس حليب، وما فهمنا، شو نحنا، من ايش مخلوقين.
يا عمي طبيعة لبنان تغيرت، ونحنا بعد ما تغيرنا، بتقلهم خلينا نتوحد ونكون ايد وحدة لان كل العالم رح ينهار، خلونا نواجه الفساد لانه هلق هو الخطر الحقيقي...
بيطلع واحد حتى يلهيك عن معركة الفساد، بقلك لا للاحتلال الايراني، ياعمي وين هالاحتلال دلني عليه، اذا الاحتلال الايراني يلي موجود بالمواد الغذائية والمحروقات يلي عم توصل للشعب باقل من كلفتها، يا خيي خلي الفرنسي والامريكي يحتلنا بالمواد الغذائية والمحروقات باقل من الكلفة.
واحد حتى يضيع الراي العام عن الفساد والفاسدين، بقول الشيعة متعصبين، يا حبيب قلبي، فيك تراجع تاريخ الكنيسة الشرقية والغربية، وحتى تراجع تاريخ الفاتيكان، ورح تشوف انه الكنائس هي يلي طبعت كتب الشيعة على حسابها من الف سنة حتى سنة 1960 ، وضلت تطبعها وتوزعها لانها بتشوف انه الفكر الشيعي هو المدخل للاعتدال في الديانة الاسلامية،
ويلي مش مصدق، هيدا عنوان بحث على جوجل ورح تلاقوا مئات الكتب الصادرة عن الفاتيكان يلي بتقول الشيعة هم شركاء حوار طبيعيون للكاثوليك والرهبان، Shiite Muslims are natural dialogue partners for Catholics and monks.
واحد حتى ما يقول سبب انهيار لبنان هو الفساد، بقلك الشيعة ما بحبوا الحياة، يا عمي اذا في حدا بحب الحياة هم الشيعة،
يا عمي اول عدالة اجتماعية عرفتها البشرية هي عدالة علي ابن ابي طالب “الناس صنفان :إما أخ لك في الدين أو نظير لك في الخلق” ، مش مصدق راجع مصادر تشريعات الامم المتحدة،
وشو الاصعب بحاولوا كلهم الايحاء انه الشيعة فقط الفاسدين وانهم يحمون الفساد، يا عمي في بالشيعة فساد متل ما في بكل الطوائف، ولكن اول ثورة اجتماعية بالتاريخ على الفساد، هي يلي قام فيها الامام الحسين، ويلي مش مصدق يتذكر وفد الفاتيكان يلي بعام 2013 شارك بمسيرة على الاقدام، ومشي من مدينة الناصرية حتى كربلاء احياء لذكرى اربعين الامام الحسين.
الاقباط اكتر المتبرعين بمصر لجامع سيدنا الحسين بمصر، ويلي مش مصدق يشوف دموع البابا شنوده: قصيدة احب الحسين.
واحد بقلك الشيعة بطلوا يشبهونا لانهم بطلوا يشربوا عرق، يا عمي تشبه بالشيعة شو مرة ولطم معهم يا حسين، اصلا جميع المسلمين محرم عليهم العرق وكل مسكر.
واحد بقلك الشيعة لبسهم ما بيشبه لبس اللبنانية، يا خيي انت ما تغير لبسك، وامشي اذا بدك بلا تياب، واترك الناس تلبس يلي بدها ياه، انت شو خصك.
واحد بقلك الشيعة بدهم يحكموا البلد، يا عمي وين بدهم يحكموا البلد، واذا بدهم يشتروا متر ارض بتقوم القيامة عليهم.
واحد بقلك الشيعة عم يعملوا ملصحتهم ماشيين مع ايران، يا خيي ما طول عمر كل الطوائف بلبنان عاملة مصلحتها، وما حدا قلها شو عم تعمل، خلي الشيعة شو مرة يعملوا مصلحتهم، ولا حلال على البقية وحرام على الشيعة.
واحد بقلك الشيعة صاروا قلهم دور، يا حبيبي ليش زعلان، او بدك الشيعة يضلوا ماسحين احذية وعتالين وعمال نظافة بس لينظفوا ويعتلوا غراض الغير، او انهم ياكلوا من ورا مسح الاحذية.
واحد بقلك ثقافة الشيعة بدها تمنع المايوه البكيني، يا اخي يا حبيبي يا عيني، ايمتا كانت الثقافة بالمايو والبيكيني والبحر، والله عيب، يا ريتك تقرا شو قال الغرب امثال جارودي وغيره عن الشيعة، وشو نقال بالشرق من امثال جبران خليل جبران، وميخائيل نعيمة، وميشال شيحا، وشارل مالك، وفارس الخوري، وبولس سلامة، وجورج جرداق، وكمال جنبلاط، وغسان التويني، وغيرهم كتير، عن الثقافة الشيعية.
مش هيك بنبني بلد ولا حتى شارع،
لبنان مش مشكلته لا بالشيعة ولا بايران، لبنان مشكلته بالفساد الموجود عند كل الطوائف، خلينا نحاسب الفاسدين، وما تنتخبوهم، وسقطوهم بالانتخابات، تتربحوا الوطن، واذا رجعتوا انتخبتوا الفاسدين، يعني غالبية الشعب اللبناني هو فاسد، ساعتها شو بفيد كل هالحكي، شو بفيد.
اصلا طول عمرها الشعوب ما بتغير، يلي بغير بالشعوب هي قيادات، يا ربنا بيبعتها، يا الناس بتخلقها، واذا الشعب اللبناني ما عرف يخلق قيادات، يعني مش رح يتغير شي، لان اكتر ما صار مش رح يصير،
وهيدي الانتخابات هي يلي رح تاكد، والفاسدين معروفين، اصلا ما في لبناني الا وتضرر منهم، ما بدنا نكذب على حالنا.
بالانتخابات يا منخليهم يفلوا عن سمانا، يا اما منتركهم لعدالة السما ومنتحاسب هونيك اذا لتقينا بالسما.
وقفوا كذب باستخدام مقولة الاحتلال الايراني لتبنيج الشعب اللبناني.
